A secretaria de Estado de Función Pública agradece o labor da Mutualidade

A secretaria de Estado de Función Pública, Lida Sánchez, presidiu a reunión do Consello Xeral de MUFACE correspondente ao terceiro trimestre do presente exercicio. Á cita, celebrada onte pola tarde na sede central da Mutualidade, tamén acudiu a directora xeral de Gobernación Pública, Clara Mapelli. Como vicepresidenta exerceu a directora xeral de MUFACE, Myriam Pallarés.

Sánchez referiuse ao novo proceso de vacinación contra a Covid-19, que se empezou a administrar a maiores de 80 anos e que coincide co da vacinación da gripe, e agradeceu unha vez máis a todo o persoal que traballa na Mutualidade o seu labor para garantir que a atención aos mutualistas seguise prestándose coas maiores garantías, “velando porque a asistencia sanitaria e asistencial non se vise en ningún momento minguada como consecuencia da situación xerada pola Covid-19”.

Orzamentos de MUFACE

A secretaria de Estado referiuse tamén a outro punto importante da orde do día: o Proxecto de Lei de Orzamentos Xerais do Estado no referido a MUFACE para 2023. A xuízo de Sánchez, “enmárcase na senda marcada polos Orzamentos Xerais do Estado anteriores, que foron claves para asentar a recuperación económica, reforzar o Estado de benestar, aumentar os dereitos sociais e impulsar un crecemento económico máis robusto e inclusivo, acelerando o cambio de modelo para facelo máis sustentable co planeta”.

Ademais, o Proxecto de Lei de Orzamentos para 2023 incorporará novamente os fondos europeos Next Generation, que están chamados a impulsar o maior proxecto modernizador de España, baseado na xustiza social, a dixitalización e a transición enerxética.

Así mesmo, o Consello foi informado dos novos pasos dados no referido ao Plan Avanza de MUFACE 2021-2023 , detallando o grao de cumprimento dos seus obxectivos.

Outro punto tratado na reunión foi a presentación as Contas Anuais da Mutualidade durante 2021, unha vez aprobadas polo Tribunal de Contas.