A directora xeral reitera o seu compromiso de revitalizar a Mutualidade

A directora xeral de MUFACE, Myriram Pallarés, mantivo unha reunión con representantes do sindicato de profesionais do ensino ANPE. Á cita, celebrada o pasado xoves 28 de abril na sede central da Mutualidade, tamén acudiu a directora do Departamento de Prestacións Sanitarias de MUFACE, Paula Roche. ANPE estivo representada por Mónica Sánchez, Esteban Serrano e José Francisco Venzalá.

Os representantes sindicais trasladaron á directora distintas demandas e reivindicacións relativas ao servizo e as prestacións da Mutualidade, solicitando que se afiance, potencie e modernice MUFACE para asegurar que non se cuestione a súa continuidade.

Myriam Pallarés manifestoulles o seu compromiso para “impulsar e revitalizar MUFACE apostando pola súa pervivencia e transmitindo a súa confianza na fortaleza do sistema tras a dura experiencia da pandemia”. Así mesmo, a directora xeral expuxo a posibilidade de  “auditar o actual modelo para analizar e mellorar a súa eficiencia e estudar novas vías de traballo xunto aos Servizos de Saúde das comunidades autónomas”.

Na reunión, tamén se falou das xestións para impulsar a implantación definitiva da receita electrónica concertada como método de prescrición, dispensación e facturación. A este respecto, a directora xeral resaltou que “xa se está avaliando cal será a seguinte comunidade autónoma onde facela viable, unha vez que verifiquemos a consolidación da mesma en Asturias, onde apenas leva un mes en marcha”.