Carta aberta da directora xeral, Myriam Pallarés

O 8 de marzo, cada ano, celébrase o Día Internacional da Muller. Esta xornada conmemora a loita mundial pola igualdade de mulleres e homes. Hoxe MUFACE súmase á felicitación colectiva e institucional mostrando o seu apoio a todas as mulleres e, en especial, a aquelas  que están na primeira liña da loita contra esta pandemia.

Na Mutualidade Xeral de Funcionarios Civís do Estado traballan 484 mulleres, que supoñen o 60,96% do persoal da Mutualidade. Actualmente, a Dirección Xeral, as Direccións de Departamento, e a Secretaría Xeral están ocupadas ao 100 % por mulleres e o 51% dos servizos provinciais diríxenos mulleres.

O colectivo total protexido por MUFACE é de 1.486.596 persoas,  das cales  826.227 son mulleres, e das mesmas 522.954 son mutualistas titulares (case un 54% do total). O colectivo feminino inclúe  segmentos tan importantes para a cidadanía  como a educación  (as profesoras de primaria  e secundaria supoñen 376.579 mutualistas) ou a  seguridade, co progresivo incremento das policías nacionais, que xa son 12.003.

Imos a máis

A aprobación recente do III Plan de Igualdade na Administración Xeral do Estado polo Goberno representa a vontade firme, ambiciosa e progresista de lograr a igualdade de xénero na AGE en termos reais. E é que a vocación de servizo público e a excelencia profesional non coñecen distinción de xénero.

Nesta senda, a Mutualidade continúa implantando medidas para responder as necesidades reais das súas empregadas e empregados en materia de igualdade. Ademais, propugna e exercita  o respecto sen concesións de este  principio constitucional á hora de deseñar prestacións, sen prexuízo da atención especial a colectivos vulnerables, entre os que por razóns socioeconómicas adoita haber máis mulleres.

Na actualidade estamos a traballar na mellora doutros campos ata agora inéditos, colaborando coa Delegación do Goberno contra a violencia de xénero na elaboración dun convenio de colaboración. Así mesmo, no marco do Plan MUFACE Avanza 2021-2023 inclúense varios proxectos que reflicten o compromiso de MUFACE coa igualdade e o fomento da corresponsabilidade.

Non quedamos, entón, en tinguir de morado o noso portal web: Igualdade en MUFACE na aplicación das súas normas, no deseño de prestacións  e na xestión das persoas. Hoxe, día 8 de marzo de 2021, MUFACE quere evidenciar e facer visible esta maioría de mulleres en todos os seus ámbitos, porque hoxe Muface se escribe con MU de muller.

Finalmente, este ano é necesario un recordo especial para as mulleres que se atopan á fronte da batalla contra a Covid-19, traballadoras do sector da saúde, científicas, investigadoras, xestoras  ou coidadoras entre outras.

Grazas a todas. Mulleres, mutualistas e empregadas públicas, felicidades.