Suprímese a permuta ordinaria de xuño

A partir do 1 de xaneiro, e durante todo o mes, as persoas mutualistas que así o desexen poden solicitar o cambio de entidade sanitaria, tanto se están adscritas aos servizos públicos de saúde como ás entidades aseguradoras incluidas no novo Concerto de Asistencia Sanitaria para 2022-2024. Para realizar unha elección informada, tamén a partir do 1 de xaneiro os e as mutualistas poderán ver a oferta das distintas entidades que resulten ser adxudicatarias do concerto na sección Atopa o teu Médico da páxina web.

Único período de cambio

Este novo Concerto, cuxa entrada en vigor terá lugar o mesmo 1 de xaneiro de 2022, contempla como principal novidade neste aspecto a volta ao período único de cambio de entidade, quedando suprimida a permuta de xuño, tal como permitía o Concerto 2021-2022.

A posibilidade de cambio extraordinario polas causas taxadas previstas no Concerto continuará nas mesmas condicións, coa mesma regulación, tal e como aparece na información da páxina web de MUFACE

Igualatorio de Cantabria: cambio forzoso

Outra das novidades do Concerto Sanitario 2022-2024 é que a esta convocatoria non se presentou o Igualatorio de Cantabria. Por este motivo,  as persoas mutualistas que elixiran esta entidade, que son en total 4.859 titulares, deben elixir algunha outra entre as que resulten ser adxudicatarias definitivas. O colectivo mutualista afectado recibiu un correo ou unha carta de MUFACE explicando como facer o cambio, que tamén deberá tramitarse entre o 1 e o 31 de xaneiro. O cambio que realicen farase efectivo o 1 de febreiro, e durante todo o mes de xaneiro teñen garantido o servizo de Igualatorio de Cantabria.

Canto á receita electrónica, poderá activarse por estas persoas mutualistas a partir do 1 de febreiro.

Elección responsable

Para unha elección responsable, a oferta dos servizos de saúde públicos e os catálogos de servizos médicos e sanitarios de entidades concertadas contemplados no novo Concerto 2022-2024 poderase consultar na páxina  “Atopa o teu médico” da web de MUFACE a partir do 1 de xaneiro.

Así mesmo, no apartado Cambio de entidade sanitaria   da páxina web ofrécese información detallada para realizar a xestión máis comodamente e sen desprazamentos, xa sexa a través da sede electrónica, con Cl@ve concertada ou Cl@ve PIN, certificado electrónico ou DNI electrónico. Se non se realiza por medios electrónicos, debe facerse por correo postal ou a través doutros rexistros, utilizando  o formulario que aparece na páxina mencionada.

Pedra angular do modelo

A libre elección de entidade é a pedra angular sobre a que pivota o modelo MUFACE, porque nela descansa a esencia da Mutualidade como exemplo de colaboración público-privada. Pasado o prazo de cambio, ofreceranse datos comparativos das solicitudes realizadas ao amparo do novo Concerto, de cuxo pormenor poderán saber os e as mutualistas no momento en que a adxudicación a entidades sexa definitiva.