Garántese o acceso aos medicamentos

As persoas mutualistas que estaban obrigadas a selar as receitas nas oficinas de MUFACE para a obtención dos seus medicamentos, por precisar autorización, poderán adquirir os seus medicamentos con receita directamente na farmacia sen necesidade de facer ese desprazamento, debido ao estado de alarma en todo o territorio nacional declarado polo Goberno o pasado 14 de marzo (Real Decreto 463/2020, ligazón a texto consolidado ), ante a emerxencia sanitaria provocada pola Covid-19.

A medida é de especial importancia, por canto, só en 2019, prescribíronse con visado un total de 952.000 medicamentos, por un importe de 67,28 millóns de euros.

No BOE de hoxe, 21 de marzo, publícase a Orde SND/266/2020 pola que se establecen determinadas medidas para asegurar o acceso á prestación farmacéutica do Sistema Nacional de Saúde ao colectivo dos Réximes Especiais da Seguridade Social, que inclúe o ámbito de MUFACE.

Entre outras, o Ministerio de Sanidade exime transitoriamente da obriga de “estampillar o selo de visado de receitas daqueles medicamentos sometidos (…) a reservas singulares consistentes na imposición de visado” previo á súa dispensación na farmacia.

Así mesmo, en atención ás persoas mutualistas que non sexan de opción pública, a Orde Ministerial faculta a cada mutualidade a garantir o acceso a tratamentos con aqueles medicamentos sen cupón-precinto e que son dispensados nos servizos de farmacia dos hospitais privados concertados, con cargo ao orzamento de cada organismo (FDH).

Medicamentos e produtos con visado: datos de interese.

Entre os medicamentos con maior número de prescricións que precisan visado figuran os antitrómbicos (anticoagulantes), con 330.00 envases; os absorbentes de incontinencia de ouriños (150.000 aprox.) e os produtos dietoterápicos (89.000 aprox.) Séguenlle os medicamentos para a demencia (70.000 aprox.), os antidiabéticos (60.000 aprox.) e os fármacos inmunosupresores –para a prevención de rexeitamentos en transplantes e tratamento de enfermidades autoinmunitarias- cuns 56.000 envases.

As medidas aprobadas hoxe polo Goberno estenderanse ata o fin do estado de alarma e das súas posibles prórrogas.

 

Sigan a nosa información na web , e no Twitter @MUFACEOFICIAL .Iremos actualizando con todas as novidades previstas en canto a farmacia e outras.