Apróbanse as axudas ao copagamento farmacéutico

O secretario de Estado de Función Pública, José Antonio Benedicto, presidiu a segunda reunión do Consello Xeral da Mutualidade Xeral de Funcionarios Civís do Estado (MUFACE) do presente exercicio. Benedicto valorou moi positivamente a aplicación das melloras introducidas nas axudas ao copagamento farmacéutico. Unhas axudas coas que se financia a adquisición de medicamentos a persoas xubiladas, viúvas e orfos e orfas  en situación de vulnerabilidade, ata igualalos ao copagamento do réxime xeral de Seguridade Social.

O secretario de Estado destacou na súa intervención que “a asistencia sanitaria do actual concerto recuperou os niveis previos á crise, ofrecendo unha cobertura sanitaria ao nivel do resto do Sistema Nacional de Saúde. O noso modelo -subliñou- conta con todo o apoio institucional e a sustentabilidade financeira que precisa, porque o coidado do noso colectivo mutualista e das súas familias é unha política prioritaria da función pública”.

Máis facilidades nas axudas ao copagamento

En relación ás axudas ao copagamento farmacéutico, José Antonio Benedicto manifestou que as novas medidas, que entrarán en vigor o 1 de xullo, pretenden dar unha resposta máis eficaz á situación de vulnerabilidade dunha parte de mutualistas que xa se atopan na xubilación, “e por iso traballamos para contribuír a resolver o seu problema, igualando o seu copagamento farmacéutico ao que corresponde ao persoal xa xubilado  do réxime xeral”.

Entre os novos criterios que se aplicarán a partir do próximo mes, cabe destacar o incremento do límite máximo de renda da unidade de convivencia, que queda fixado en 15.000 euros, e da contía mínima das axudas, que se establece en 50 euros. Outra novidade é a ampliación a tres meses do período no que se poden solicitar as axudas: entre xullo e setembro. Estas aboaranse, tras a súa aprobación, a finais do exercicio.

A previsión é que este ano calquera mutualista que se beneficie desta medida chegue aos 2.000 e que a axuda media percibida sexa de 227 euros. A xestión destas solicitudes poderá facerse a través da Sede Electrónica de MUFACE.

Avance dixital

Precisamente, outro dos puntos tratados no Consello, e ao que se referiu o secretario de Estado, foi o proceso de transformación dixital da Mutualidade, que xa permite a tramitación electrónica da maioría de prestacións sen necesidade de desprazamentos, e da que xa se están beneficiando miles de mutualistas. En 2018 o portal www.muface.es recibiu 3,8 millóns de visitas, un 28,6% máis que o ano anterior, e en tan só un ano a sede electrónica de MUFACE case triplicou o número de usuariosy usuarias, pasando de 92.272 en marzo de 2018 a 242.000 no mesmo mes de 2019.

Receita electrónica pública

Outro dos asuntos sobre os que foi informado o Consello foi o da evolución dos traballos desenvolvidos para a integración de mutualistas na receita electrónica pública. Xa se subscribiron acordos con sete comunidades autónomas -Navarra, Murcia, Galicia, Asturias, Castela-A Mancha, Cantabria e Aragón-, nas que residen un terzo das persoas mutualistas adscritos a MUFACE que optaron pola asistencia sanitaria pública.

Estes acordos establecen a inmediata posta en marcha dos traballos de coordinación necesarios para o acceso a esta prestación, o que redundará nunha mellora da calidade asistencial, da calidade da información sobre a historia farmacoterapéutica de calquera paciente e nunha maior seguridade no uso dos medicamentos.

Memoria 2018

Os membros do Consello aprobaron a Memoria 2018, na que, entre outros datos salientables, cítase o incremento histórico de titulares, que en 2018 alcanzou os 984.867 (ademais de 488.774 persoas beneficiarias), cifra marca nos 42 anos de historia do organismo. A información recollida no memorándum da Mutualidade confirma así mesmo o incremento xeral da calidade asistencial e un avance inédito das tecnoloxías sanitarias, ás que agora pode acceder o colectivo mutualista.

IT e reforzamento de persoal

Por último, outros temas sobre os que se informou ao Consello foron a reforma da Incapacidade Temporal -considerada no punto 20 do Plan de Impulso e coa que se busca axilizar a tramitación deste tipo de axudas e a redución da demora na percepción do subsidio por parte da persoa mutualista-, e o concurso para a provisión de postos de traballo en MUFACE, cuxo principal obxectivo é mellorar o servizo de atención ao público en toda a rede da Mutualidade.